Selecta in Judices

[00001]    ΩΡΙΓΕΝΟΥΣ ΕΚΛΟΓΑΙ ΕΙΣ ΤΟΥΣ ΚΡΙΤΑΣ.

[00002]    ^[12.949] Καὶ εὔξατο Ἰεφθάε εὐχὴν τῷ Κυρίῳ.

[00003]    Εἰ Πνεῦμα Κυρίου ἐπ' αὐτὸν, πῶς εὔχεται ἃ μὴ προσήκει;

[00004]    Ἐνῆν γὰρ καὶ κύνα ἀπαντῆσαι ἐπανιόντι τῷ Ἰεφθάε.

[00005]    Ἆρ' οὖν ἐσφάλη τὸ Πνεῦμα;

[00006]    οὐδαμῶς·

[00007]    ἀλλὰ τὸ μὲν Πνεῦμα βοηθεῖν παραγέγονεν, οὐχ ὑποβάλλειν τὴν ἄτοπον εὐχήν·

[00008]    αὐτὸς δὲ σφάλλεται ἀπερισκέπτως ὑποσχόμενος.

[00009]    Καὶ εἶπαν αὐτῷ Εἱπὸν δὴ στάχυς.

[00010]    Οἱ δὲ ἔλεγον στάχυς·

[00011]    σημαίνει σέβηλα, ὅπερ ἐστὶν ἄσταχυς.

[00012]    Οἱ δὲ ἔλεγον σεβήλω καὶ οὐκ ἐδύναντο τρανῶς εἰπεῖν σέβηλα.

[00013]    Εἰ γὰρ καὶ Ἑβραῖοι ἐτύγχανον, ἀλλὰ κατὰ συμμετρίαν βραχύτητι παρήλλασσον ἐν τῇ τῆς διαλέξεως προφορᾷ.

[00014]    Τὸ οὖν σύνθεμα ἦν σέβηλα, ὅπερ οἱ ἐπερωτώμενοι λέγοντες σεβήλω, ἠλέγχοντο οὐκ ὄντες τῶν οἰκείων τοῦ Ἰεφθάε, ἀλλὰ τῶν ἐπαναστάντων.

[00015]    Καὶ γυνὴ αὐτοῦ στεῖρα καὶ οὐκ ἔτεκεν.

[00016]    Οὐκ ἀπὸ τῆς φύσεως, ἀλλ' ἀπὸ τῆς διακονίας ἐπὶ τοῦ παρόντος στείραν καλεῖ.

[00017]    Σίδηρος οὐκ ἀνέβη ἐπὶ τὴν κεφαλήν μου ὅτι Ναζιραῖος τοῦ Θεοῦ ἐγώ εἰμι.

[00018]    ∆ι' ὅλης τῆς περὶ τὸν Σαμψὼν ἱστορίας αἱ τρίχες φαίνονται τὴν πᾶσαν αὐτῷ περιποιεῖν ἰσχύν.

[00019]    Τοῦ αὐτοῦ.

[00020]    Ναζιραῖον τὸ πεφυλαγμένον κατὰ τὴν Σύρων φωνὴν ὀνομάζει.

[00021]    Μὴ ἐξακολουθεῖν δὲ τῇ τάξει τῶν Ἰσραηλιτῶν τὸν Σαμψὼν ὁ Θεὸς προστάσσει, κατ' ἐκεῖνο καιροῦ τὴν κεφαλὴν ξυρωμένων διὰ τὸ εὐσήμους εἶναι πρὸς πάντας.

[00022]    Καὶ ἐποίησεν Ἐφὼδ καὶ Θεραφείν.

[00023]    Ἐφὼδ ὕφασμα ἦν ἱερατικὸν, ὅπερ περικειμένῳ τῷ ἱερεῖ ἐφοίτα τοῦ ἁγίου Πνεύματος ἡ χάρις.

[00024]    Τὸ δὲ Θεραφεὶν τοιοῦτο μέντοι, οὐ θεϊκὸν δὲ, ἀλλ' εἰδωλικὸν, ὡς ἐν ταῖς βασιλείαις δείκνυται.

[00025]    Καὶ ἐξῆλθον οἱ υἱοὶ Βενιαμίν.

[00026]    Τίνος ἕνεκεν ἡττῶνται δικαίως ἐπελθόντες;

[00027]    Ἢ δῆλον ὅτι διὰ προλαβούσης αἰτίας.

[00028]    Καὶ ὁ ψαλμός φησιν·

[00029]    «Ὅταν λάβω καιρὸν, ἐγὼ εὐθύτητας κρινῶ.».

[00030]    Εἶτα καὶ μετὰ τὸ ἡττηθῆναι, καὶ μίαν καὶ δευτέραν, μετῆλθεν ὀργὴ ἐπὶ τοὺς ἠδικηκότας, καὶ νικῶσι δίκαιαν νίκην.

[00031]